我知已經開始回暖，而家先黎post冬天打包分享真係遲左少少嘅，無計啦，一月真係飛到好攰，放假又作病，臣妾盡左力架啦，遲到好過冇到丫嘛。

自從上年睇過羽絨製作的片段，嗰種震撼同慚愧令我無再着羽絨了。為左幾日既保暖令動物受不必要既皮肉之苦，人類真係好自私。（羽絨用既毛一定要生拔唔係唔值錢，而鵝隻一生要受拔毛的血肉之苦約三次），所以今年我既禦寒衣服都盡量使用其他物料代替羽絨。

最好既保暖方程式就係洋蔥式着法，姐係一層一層，如果由室內入溫暖既室內記得要除衫，唔係好易焗親，又或者出返户外嗰陣失溫。而我既穿搭大概如下～（睇相會有更多details、價錢同購買資訊。）

上身

1. 保暖內衣：唔夠嗰陣我會打孖上

相片來源：作者Facebook專頁

2. 有厚度既打底：因為我皮膚好易痕，直接着冷衫好易敏感，所以習慣會着全棉tee隔一隔，揀嗰陣盡量揀啲有少少厚度同密織既，冷衫既毛就唔會拮到肉，亦都唔透風。

相片來源：作者Facebook專頁

3. 線衫 / 羊毛冷衫：個人覺得冷衫係將熱力同水份鎖住既重要單品，我鍾意幼冷而織得好密既冷衫，無咁易漏風，而全羊毛保暖度更佳。高領羊毛冷衫可以暖頸，身子弱呀老啦唔可以涉親架啦。

相片來源：作者Facebook專頁

4. 人造毛毛褸 / 夾棉褸 / 厚羊毛褸：視乎溫度，普普通既zip up hoodie其實都夠。內屬有厚抓毛既話會更暖。

呢件zip up好處係拉鍊去到下爬位，超擋風，撞正佢減價，港幣百三蚊有找。相片來源：作者Facebook專頁

夾棉褸一樣啦，揀嗰陣要留意埋隻袖都要有內膽啊，唔係等變獨臂神尼啦。相片來源：作者Facebook專頁

要著得formal d既話，1-3可以不變，而外套就換做類似既厚外套，唔一定要羊毛，最緊要夠實淨唔透風。相片來源：作者Facebook專頁

5. 防水厚風褸：雖然唔係最厚但都好重要嘅最外層！一定要防水擋風同有帽，落雨落雪都唔驚，而有袋就可以插袋保暖同放一啲常用小物例如散字紙巾，就算手指凍僵左都易啲搵到。

相片來源：作者Facebook專頁

下身

1. 夾絨層褲子：最好有褲頭繩束腰、小口袋放小物，挑鬆身一點，不夠暖配合虧佬褲或襪褲着，包你暖到生熱痱。

內裡抓毛的都幾好，唯一缺點係會覺得對腳好粗。相片來源：作者Facebook專頁

2. 羊毛襪褲 加 褲 / 裙：着左襪褲之後可以襯長裙或九分闊褲

相片來源：作者Facebook專頁

3. 厚襪 / 羊毛襪

相片來源：作者Facebook專頁

4. 厚底鞋：去凍既地方唔好貪靚着平底鞋，腳板唔暖上身着幾多都無用。最好夠厚底拉開腳板同地面既距離，防滑底就更好。

相片來源：作者Facebook專頁

小物

1. 手套：最好有絨層或毛毛

2. 冷帽：暖住頭殻頂同冚住耳仔，這頂有heat tech物料。

3. 頸巾：最緊要夠大條，包到實一實，最好可以包埋個鼻同下爬，怕羊毛易痕，針織的都不錯。

4. 口罩

5. 暖水瓶：寒天雪地有熱野飲真係享受！我會帶美綠或者熱柚子蜜，因為個人一凍就好易餓，飲啲甜野個人都舒服啲。

去過-20度既玻利維亞5000米高原、凍傷塊面既瑞士既雪山山頂、溶雪中既白川鄉、又或者積雪中既new york，唔需要羽絨或暖包暖貼，我依然survive得好好。

實有人話羊毛製品其實都好殘忍，我知羊隻被剃毛嗰陣都俾人暴力對待，但相比活剝皮草同拔毛之下，羊毛係我暫時搵到既替代方案。

P.S 利申，分享既保暖單品全部自己真金白銀買，無sponsor非鱔稿。如果你係去日本旅行，建議你可以去到當地先買，因為當地天氣凍開，保暖既衣物普遍平啲選擇又多啲，買夠一萬円又可以退稅，好扺。

原文刊於《麻甩空姐手記》，獲作者授權轉載。文章標題經TOPick修改，原題為〈空姐的旅行箱不需羽絨渡嚴寒〉。